黨派好搞，屎就好食

【文、圖／彭欽清／國立政治大學退休教授】

 

　　自古以來，無論哪位个人，逐儕就會想愛抓大權，有大權自然就會有大錢。民主時代，愛抓大權就愛先過選舉這關。

　　一月十一个總統、副總統過立法委員个選舉一忒，當多人就敨一下大氣講：該載選煞欸！係毋煞，人會癲忒。　　　　

　　人講个：戲棚頂个係癲仔，戲棚下係戇仔。選舉乜共樣，逐個候選人一企啊到臺頂就講到口涎波潑，開歸大拖囉仔个空頭支票，總係做該詐癲食狗屎个齣事，信佢个人就像分魍神仔牽著樣仔，聽到呆呆，戇戇四跈佢行。候選人造勢該下，輒常乜會看著臺頂高个人無恁癲，顛倒下背聽个人較癲。

　　臺灣个選舉實在有忒輒兜仔，村里長、鄉鎮民代表、鄉鎮長、縣市議員、縣市長、立法委員、正副總統這兜輪等來選。見到選舉時期歸隻社會就像在該挷大索比賽樣仔，兩片个人馬都屎朏空塞等來挷到緪繃繃仔。　

　　這擺个選舉已像挷來脫體合線，報紙、電視、電臺各有立場毋使講，這下因爭line、面書這兜社群媒體轉傳當利便，各種資訊，毋知真个抑係假个，一撳就出去，各種消息一哪仔傳，結果呢，立場無共樣个網軍就打來打去。

　　原在人選舉，黨派分到當利，該央時運動員會一家屋一家屋去拜託，盡尾就會有候選人買票。有个買鐵票，有个買吂決定愛頓麼人个，還有人總洗。第一屆苗栗縣長選舉該擺，還有拿候選人來準歌仔唱个：「黃運金，拿錢分人食點心；點心食啊忒，選分劉定國」。

　　過後，苗栗縣个政治界就分劉、黃兩派。大細選舉兩派就會推出候選人，拚到半生死，連日常生活乜輒常分到當利，輒輒因爭為著派系，兄弟打逆面，鄰舍無講話，親戚朋友無來無去，這派人開个店，該派人毋會去同佢交官。

　　吾爸係死劉派，劉定國選縣長該擺，自家个頭路放等去同佢擎大旗，標著个樹仔放到泰安鄉个大安溪脣，想講等選忒正來放，無想著一下發大水，樹仔分大水滂淨淨，一下就覆覆，背債背忒兩十年。

　　吾姆盡閼，喊𠊎兄弟仔定著毋好去搭選舉。𠊎從細仔看著黨派鬥到恁得人驚，一直就毋想加入麼个黨。高中、大學、做兵、教書，盡多人勸𠊎入黨，𠊎就想盡辦法推辭忒。民國八十二年四月份个《客家雜誌》𠊎識發表過〈派系〉這首詩：

　　

　　為著派系

　　無麼个親戚

　　為著派系

　　無麼个朋友

　　為著派系

　　無麼个隔壁鄰舍

　　為著派系

　　大家都面畫烏來

　　親戚　朋友　隔壁鄰舍

　　全部投到屎缸肚

　　老人家講个

　　派系好搞　屎就好食

　　還有影喔

　　

　　這擺選舉聽講好多仔人為著扶無共黨派个候選人，親戚朋友、子爺仔、子哀仔公開在網路項冤家泌背，吾這首詩正經係無影又的對喔。

　　
（四縣腔） 彭欽清教授 聲檔 — 黨派好搞，屎就好食






　

▲BACK